Kinsay majority bloc sa konseho?

CEBU, Philippines — Duha-duhaan pa kon unsa nga grupo ang maisip nga mayorya o minorya sa Konseho sa Siyudad sa Sugbo human sa diskwalipikasyon ni Konsehal Alvin Arcilla ug sa pagbalhin sa ubang mga konsehal.

Si Konsehal Nestor Archival miangkon nga ang mga kalambuan kalabot sa mga sakop sa Bando Osmeña-Pundok Kauswagan (BOPK) makabalaka kanila ilabi na nga giingong padayong nangagni sa ilang mga kauban ang Partido Barug-PDP Laban.

Nasayran nga ang Commission on Elections en banc miisyu og certificate of finality sa disqualification ni Arcilla kinsa napakyas sa pagkuha og temporary restraining order (TRO).

Kon mapatuman ang maong disqualification, ang balaud nag-ingon nga ang ika-siyam nga kandidato sa miaging piniliay, nga mao si Jerry Guardo, iproklamar ug ipuli kang Arcilla.

Si Guardo ug si reelected Councilor Dave Tumulak una nang mipadayag nga mosuporta sila sa administrasyon ni Mayor-elect Edgardo Labella.

Si Archival nagkanayon nga ang laing problema nga giatubang karon sa BOPK mao ang kapalaran sa kaso ni Konsehal Sisinio Andales.

Ang Comelec en banc nagpatuman sa desisyon sa Comelec Second Division nga mitugot sa duha ka petisyon ni Allen Canoy kinsa mihangyo sa pagkansela sa kandidatura nila ni Andales ug Arcilla human sila nakaserbisyo na og tulo ka termino.

Samtang ang en banc wala pa mohatag og resolusyon sa kaso ni Andales, si Archival miingon nga ang grupo motabang kaniya.

Si Andales, sa iyang bahin, miangkon nga ang desisyon sa en banc posibleng ipagawas sunod semana ug iyang siguraduhon nga ang tanang legal nga mga remedyo iyang buhaton kon dili pabor kaniya ang resulosyon. Kon si Andales madiskwalipikado, ang nagsunod niya nga kandidato sa miaging eleksyon mao si Joel Garganera.

Kon kini mahitabo, ang Partido Barug-PDP Laban makabaton na unya og 10 ka konsehal samtang ang BOPK adunay walo apil na ang mga ex-officio members.

Si Comelec-Cebu City North District Election Officer Atty. Marchel Sarno nagkanayon nga ang iyang buhatan maghulat lang sa en banc nga hatagan og motion for execution kon kinahanglan nga ipasaka kini ni Canoy aron ipatuman ang disqualification batok kang Arcilla.

Human sa paghatag sa maong mosyon, si Sarno nagkanayon nga ang buhatan maghulat usab sa usa ka mando nga mag-reconstitute sa board of canvassers alang sa proklamasyon sa mga opisyal nga nagsunod sa na-disqualified. (/DILT)(BANATNEWS)