CEBU, Philippines — Pito ka konsehal sa Partido Barug PDP-Laban alang sa 15th Sangguniang Panlungsod ang dili mahatagan og committee chairmanships ug memberships.
Kini matud ni reelected councilor Sisinio Andales sa Bando Osmeña Pundok Kauswagan (BOPK).
Matud ni Andales nga consensus sa BOPK councilors nga dili tugotan ang konsehal sa umaabot administrasyon nga mohupot og mga komitiba.
Ang BOPK maoy nakakuha sa majority bloc ug tungod niini makabuot sila sa assignments sa tanang standing committees. Ang pito ka nahisgutang konsehal sa umaabot nga administrasyon naglangkub nila ni Prisca Niña Mabatid, Raymond Alvin Garcia, Donaldo Hontiveros, Phillip Zafra, Renato Osmeña Jr., Eduardo Rama Jr., ug Antonio Cuenco.
Sa habig sa BOPK gilangkuban nila ni Andales, Dave Tumulak, Raul Alcoseba, Eugenio Gabuya Jr., Nestor Archival, Alvin Arcilla, Alvin Dizon, Joy Augustus Young, Lea Japson, ex-officio members Franklyn Ong ug Jessica Resch. Sa kasamtangan si councilor-elect Nestor Archival kinsa maoy mahimong majority floor leader nagkanayon nga i-finalize pa nila ang assignments sa mga komitiba.
Hinungdan nga dili pa sila makabutyag sa draft committee sa chairmanships ug memberships apan matud ni Andales nga walay major changes sa assignments. Sa iyang bahin, si Garcia nagkanayon nga dili una angay mokampante ang BOPK councilors nga sila maoy mahimong majority sa dili pa ang Hulyo 2. Si Garcia niluwat sa maong pamahayag subay sa desisyon sa Comelec en Banc nga nagkanselar sa kandidatura ni Arcilla. (BDB) (BANAT NEWS)