Lima pa naka-file sa SOCE sa Cebu City
CEBU, Philippines — Hangtud kagahapon, lima pa lang sa mga kandidato sa Dakbayan sa Sugbo sa niaging eleksiyon ang nakaduso sa ilang Statement of Contributions and Expenditures (SOCE) sa buhatan sa Commission on Elections samtang ang deadline unya na sa Hunyo 13. Ang mga nakaduso mao sila si Konsehal Antonio Cuenco, Alvin Dizon, David Tumulak, Joy Augustus Young ug Kongresista Rodrigo Abellanosa.
Sa lima, si Abellanosa maoy dunay labing daku nga gasto nga niabot sa P460,500 ug gisundan ni Cuenco nga dunay gasto nga P411,565.30.
Si Young sa iyang bahin dunay gasto nga P174,793.39, kang Dizon P153,680 samtang si Tumulak dunay gasto nga P65,616.60.
Si Comelec Cebu City South District Election Officer, Atty. Marchel Sarno, niingon nga kadtong mga kandidato nga nidaug ug napilde kinahanglan moduso sa ilang tagsa-tagsa ka SOCE. Kun mapakyas, sila mapahamtangan og silot tungod kay election offense kini.
Sa mga first time violators, mobayad sila og administrative fine gikan sa P1,000 ngadto sa P3,000; sa second time offenders multa nga P2,000 ngadto na sa P6,000 ug ma-disqualified sa paghupot og katungdanan. “Ang SOCE importante kaayo, sa nakadaug kinahanglan siya para mo-assume ta sa atong katungdanan, ikaduha sad naa tay mga deadline og dili nato tumanon naa tay corresponding penalties.
Sa katong napilde nato nga mga kandidato nga naa pay huna-huna nga mo-file importante kay ni siya pero katong sa mga kandidato nga ni-file apan ni withdraw or bisag wala nay huna-huna kinahanglan gihapon na siya kay naa man gihapon fine nga inkaso dili ta mo-file og SOCE, so this is one of the commitment nato atong pag-file og COC ug nakahinumdum sila gipahibalo daan sila sa Commission on Elections nga gitagaan sila og one month after to election to file SOCE,” sigun ni Sarno. (BANAT NEWS)
- Latest
