CEBU, Philippines — Nakugang ang National Historical Commission of the Philippines sa pagsugod na og kabkab sa tukuran sa 20-storey Capitol Resource Center bisan walay development plan.
Matud sa Chairman of the Board sa NHCP, Dr. Rene Escalante, nga wala pa ni-isyu ang ilang buhatan og clearance sa maong proyekto tungod kay wala pa kini nakaduso og development plan nga pinirmahan sa mga tukmang ahensiya.
Sumala pa ni Escalante nga aduna silay mga standard nga gisunod sa paghatag nila og clearance sa mga proyekto.
Dugang pa ni Escalante nga nakugang siya nga aduna nay gitrabaho labot sa maong proyekto tungod kay wala man silay rehiyonal nga buhatan sa Sugbo ug nagsalig lang sila sa mga Local Government Units apan iya kini ipasusi sa iyang mga tawo.
Gibutyag ni Escalante nga bisan kinsa nga mga cultural agencies nga moduso og formal complaint bahin sa maong proyekto tukion kini sa technical working group nga gilangkuban sa NHCP, Department of Public Works and Highways, Department of Interior and Local Government ug uban pa.
Giklaro ni Escalante nga ang maong proyekto nakapakita lang og perspective apan walay pormal nga development plan nga giduso sa ilang buhatan. (BANAT NEWS)