CEBU, Philippines — Naalarma ang kapolisan sa Dakbayan sa Talisay sa ilang nakita nga daghang vandal sa mga lawak saringan sa pampublikong tunghaan sa maong siyudad.
Ang hepe sa Talisay City Police Station nga si Police Lt. Col. Marlu Conag miingon nga nagkuyog sila ni Police Sr. Supt. Manuel Abrugena, direktor sa Cebu Provincial Police Office sa pagsuroy sa mga tunghaan diin misugat kanila ang mga vandal sa mga bungbong sa mga classrooms.
Iyang nakita nga kasagaran nga gipangsuwat mao ang mga logo sa mga fraternities ug gang.
Asoy ni Conag nga dili kini maayong talan-awon ilabi na gyud ngadto sa mga kabataan.
Naglaraw siya nga pintalan ang maong mga hugaw nga bungbong aron ibalik sa normal ang makita sa mga tinun-an.
Hinuon sa pagkakaron, nangita pa siya og pintal nga magamit hinungdan nga siya nangayo og tabang aron makapalit ug pintal. Iya sab gidapit ang mga fraternities nga motabang kanila sa pagpintal sa mga bungbong ang gibandalan. (BANAT NEWS)