Kagawad gihatagan og honoris causa

CEBU, Philippines — Hugot nga gipatuman sa Barangay Mactan, Dakbayan sa Lapu-Lapu ang kahapsay ug kalinaw ingon man kalimpyo sa lugar isip usa sa gihugupan sa mga turista. Si Barangay Konsehal Zandro Augusto, chairman sa committee on peace and order, women ug sanitation, sa iyang pamahayag niingon nga usa sa mga lugar sa ilang barangay nga gibisita sa matag adlaw sa mga langaw nga turista mao ang makasaysayanong Liberty Shrine nga gipalapdan na ang maong dapit niining panahona.

Matud niya nga daghan ang naikag sa pagbisita sa maong dapit sanglit naila na man ang maong lugar sa Barangay Mactan sa pagpahigayon sa tinuig nga kasaulogan ug reenactment sa Kadaugan sa Mactan nga maoy nahimong sentro sa pagbisita sa mga langyaw nga turista ug uban pa nga mga dumuduong.

Si Augusto kinsa aktibo sa pagpangulo sa mga kalihukan sa pagpatuman sa kahapsay ug kalimpyo sa palibot sa ilang dapit ang nipadayag nga labi pa nga magmalambuon ang ilang dapit tungod usab sa pagsulod sa nagkadaiyang patigayon.

Ang gipakita nga kaaktibo ni Augusto sa pagserbisyo sa ilang barangay mao usab ang nahimong basehanan sa paghatag kaniya og Doctor of Humanities (Honoris Causa) sa Northwestern Christian University sa Port Richery, Florida, U.S.A.

Gidawat ni Augusto ang iyang degree certificate pinaagi nila ni Bishop Seth M. Lagunda nga presidente sa NCU Asia-Pacific uban ni Bishop Dr. Howard M. Sarkela nga maoy founder ug chancellor sa NCU nga gipahigayon sa Big Hotel sa Dakbayan sa Mandaue niadtong Hunyo 6. (/GMR)(BANATNEWS)