CEBU, Philippines – Dungan nga nanumpa ang tanang kandidato sa Unang Distrito nga sakop sa partidong Alayon nga nakadaug sa miaging piniliay.
Unang nanumpa si City of Talisay Mayor Eduardo Gullas ug karon Congressman-elect ngadto kang Senadora Cynthia Villar.
Samtang ang mga mayor-elect nga sila si Minglanilla Mayor Elanito Peña, City of Naga Mayor Valdemar Chiong, San Fernando Mayor Lakambini “Neneth” Reluya, Carcar City Mayor Mercy Apura ug Sibonga Mayor Lionel Bacaltos nanumpa kang Congressman ug mayor-elect Gerald Anthony “Samsam” Gullas.
Si Kongresista Gullas mihurar kang Carcar City Mayor Nice Apura isip mayor-elect sa Talisay nga maoy host sa kalihukan.
Matud sa batan-ong Gullas nga gipili niya nga Carcar manumpa ug kang Mayor Apura mohurar kay kini ang last termer nga mayor ug kini usab ang naghatag kaniya og labing daku nga botos niadtong 2016 nga piniliay dihang nagpapili siya pagka kongresista.
Nagpasalamat usab kini sa tanang katawhan, mga kapitan ug sa mga kaalyado nga pabiling naghugpong alang sa kalampusan.
Mitambong usab sa maong kalihukan si Governor-elect Gwendolyn Garcia kinsa nagpasalamat usab sa Alayon nga daku kaayo og tabang nga makabalik siya sa Kapitolyo. Gisaad niini nga himuong 25 ka oras ug walo ka adlaw ang iyang pagtrabaho aron mahibalik pagka numero uno ang Lalawigan sa Sugbo.
Uban ni Villar sa maong kalihukan mao si Senador-elect Imee Marcos diin silang duha nagpasalamat sab ug misaad nga mahatag ang gikinahanglan sa ilang mga kaubanan sa Unang Distrito.
Human mihurar ang mga mayor, gisunod usab dayon ang pagpanumpa sa mga board members ug sa tanang konsehal sa matag lungsod ug dakbayan sa naasoy nga distrito. (Rowena D. Capistrano/DILT)(BANAT NEWS)