CEBU, Philippines — Paimbestigaran sa direktor sa Police Regional Office-7 ang polis nga nalutsan og bench warrant human walay tunga-tunga sa hearing sa dinakpan niini sa drugas niadto pang tuig 2016.
Matud sa direktor nga si Police Brigadier General Debold Sinas nga grave offense kini sa kapolisan ug hayan nga mataktak kini sa serbisyo kun mapamatud-ang tuyo nga gilimot-limotan sa polis ang hearing sa kaso.
“Ang bench warrant kasi, nalimotan sa polis nga mag witness sa kaso, automatic na grave offense, grave neglect na. I will check sa iyahang bench warrant nganong naisyuhan siya sa court nga mandatory man mi mo attend og court hearings,” ang heneral nagkanayon.
Ang regional headquarters na ang molihok sa imbestigasyon diin hayan mapasakaan kini og kasong administratiba. Gipahinumduman sa maong heneral ang iyang mga polis ilabi na kadtong adunay gihuptang kaso sa illegal nga drugas nga dili kalimtan ang mga hearing sa kaso aron nga dili ma-dismiss sa korte.
Nasayran nga niadtong Mayo 31, nalutsan og bench warrant of arrest si Patrolman Michael Llanes Flores, 33 anyos, aktibong polis sa Mabolo Police Station.
Si Flores pugsanong gipatawag sa korte sanglit giingong wala siyay tunga-tunga sa court hearing sa iyang dinakpan sa drugas nga si Ernesto Barillano alyas Botyok, criminal case number R-CEB-17-06647.
Si Barillano giingong niadtong 2017 pa nadakpan sa operasyon kontra drugas diin nakapiyansa kini og dos mil pesos. Una na siyang gipanalipdan sa hepe sa Mabolo nga si Police Major Dindo Juanito Alaras nga nakalimtan kini ni Flores nunot na sab sa kadaghan na sa iyang nadakpan sa ilegal nga drugas. Nahusay ra sab ang warrant sanglit naka-atubang na sa korte niadtong Biyernes si Flores. (BANAT NEWS)