CEBU, Philippines – Gitagsa-tagsa og susi sa kapolisan sa Siyudad sa Talisay ang mga motorsiklo sa Sitio Mananga, Barangay Tabunok sa niaging adlaw.
Si Police Major Ardeolito Cabagnot, deputy chief sa Talisay City Police Station, nagkanayon nga uban sila sa Highway Patrol Group (HPG) sa paghimo sa operasyon nga pinangulohan ni Police Captain Mike Gingoyon.
Asoy pa niya nga sa ilang pagsusi wala silay nakita nga motorsiklo nga kinawat gamit ang kahimanan sa HPG nga masusi dayon ang motorsiklo kun kini ilegal o legal ba.
Ang Mananga naila nga tapokanan ug tagoanan sa mga ilegalista.
Si Cabagnot nitataw nga nakabantay ang mga ilegalista sa ilang presensya hinungdan nga wala silay nakuhang mga motorsiklo nga kinawat apan mohimo gihapon sila og kinalit nga operasyon. (/GMR)(BANAT NEWS)