Davide nabalaka iyang proyekto di mapadayon
CEBU, Philippines – Niangkon si Gobernador Hilario Davide III nga aduna siyay kabalaka nga dili ipadayon sa sunod nga administrasyon ang iyang mga nasugdan nga programa ug proyekto ubos sa iyang termino.
Si Governor-elect Gwendolyn Garcia gikatakda nga molingkod sa Kapitolyo sa Hunyo 30 samtang si Davide mao sab ang bise gobernador kinsa dili sila kaalyado sa politika.
Matud ni Davide nga anaa ra kang Garcia kun unsa ang mga ipadayon ug dili ipadayon nga programa.
Nanghinaut si Davide nga ipadayon ni Garcia ang mga programa sama sa pagpalambo sa 16 ka provincial ug district hospitals ilabi na nga ang Probinsiya sa Sugbo maoy usa sa pilot area sa pipila ka probisyon sa Universal Health Care Act.
Nanghinaut usab si Davide nga mapadayon ang Farmer Scientist Training Program sa mga mag-uuma sa lalawigan.
Si Davide una na nga nagkanayon nga dili siya mahimong “obstructionist” sa administrasyon ni Garcia.
Wa usab siya mabalaka nga mayoriya sa Sangguniang Panlalawigan kaalyado ni Garcia.
“Dili man ta angay mabalaka, we should unite even kay ang objective nato, we are in office to serve unya mahatag ang needs sa mga Sugboanon,” matud ni Davide kinsa nidugang nga sa ilang paglingkod wala nay pamolitika pa.
“I have mandate to fulfill. Majority of the Cebuanos voted me as vice governor unya under the Local Government Code naa man didto ang list sa mandate sa vice governor,” matud ni Davide. (/GMR)(BANAT NEWS)
- Latest
