Staff ni Davide lang ang iyang madala
CEBU, Philippines – Makigtagbo si Gobernador Hilario Davide III sa iyang mga department heads ug mga empleyado aron pagplano sa bag-o niyang posisyon sa Kapitolyo isip bise gobernador.
Niangkon si Davide nga dili tanan sa iyang tawo sa executive department iyang madala sa iyang bag-ong opisina ug posible nga ang iya lang mga kawani sa governor’s office.
“I have to give priority sa ako mga co-workers here sa Office of the Governor kay diri man sila nagtabang nako sa opisina then I will ask them one by one, I will be meeting them very soon, I will ask them unsay ilang plano sa iyang kinabuhi kung mopadayon pa sila pagtrabaho sa Kapitolyo with me or dili na,” matud ni Davide.
Makighinabi usab si Davide sa mga department heads nga iyang tinudlo sa iyang termino isip mga permanent ug regular.
Kini sama nilang Baltazar Tribunalo sa Disaster Office, Jone Zeigfred Sepe sa General Services Office, Ivy-Durano Meca sa Anti-Drugs Office, Engr. Hector Jamora sa Engineering ug Roldan Saragena sa Agriculture.
Ang mga assistant department heads mao sila si Rodel Bontuyan sa PENRO ug si Dr. Rene Catan sa PHO.
Si Davide nabalaka usab sa posibleng mahitabo sa ubang empleyado sa Kapitolyo ilabi na ang mga nurses ug doctors sa mga provincial ug district hospitals nga ang uban ubos pa sa contract of service.
Matud ni Davide ang mga job order nasayud na daan nga walay security of tenure sa panrabaho sa gobiyerno apan ang mga casual nanghinaut si Davide nga ma-evaluate pag-ayo.
Si Governor-elect Gwendolyn Garcia una na nga nagkanayon nga ipaubos sa performance review ang mga empleyado sa Kapitolyo.
Masaligon hinoon si Davide nga adunay “measures” si Garcia nga dili maapektohan ang serbisyo sa nagkadaiyang buhatan ilabi na sa mga hospitals sa probinsiya kun ugaling aduna gyuy matangtang nga mga empleyado.
Ang Kapitolyo adunay 4,021 ka empleyado diin 1,118 ang regular, 636 ang casual; 1, 905 ang job order ug 362 ang contract of service nga kasagaran mga doctor, nurses ug uban pang medical personnel. (/GMR)(BANAT NEWS)
- Latest
