CEBU, Philippines — Patay ang usa ka 22-anyos nga lalaki human kini nagkutlo sa iyang kinabuhi pinaagi sa paghigot og pisi sa iyang liog diha sa Sitio Huya, Barangay Tisa, Dakbayan sa Sugbo alas kwatro kwarentay singko sa kaadlawon adlaw nga Domingo. Ang naghunos sa iyang kinabuhi mao si Melchor Cabaluna, dunay kapuyo, housekeeper ug residente sa maong lugar.
Nakadawat og tawag ang kapulisan gikan sa usa ka Mylene Selma nga adunay tawong nagbitay sa pisi nga wala nay kinabuhi diha sa ilang dapit.
Base sa inisyal nga imbestigasyon, padulong unta mangihi si Selma sulod sa pansayan sa dihang nakit-an niyang nagbitay si Cabaluna nga adunay higot nga nylon ang liog niini.
Ang impormante dali nga nanawag og tabang sa mga siligan ug gitabangan sa mga residente pagbadbad ang pisi sa liog sa namatay ug nitawag og polis ug ambulansiya. Sa pagpalalom sa kapulisan sa imbestigasyon pinaagi sa kapuyo niini nga si Grace Selma, sa wala pa kini magkutlo sa kinabuhi nakaaway kini sa kanhi kapuyo sa iyang kapuyo karon apan nauli ra kini.
Base sa initial nga pakisusi ni Police Staff Sgt. John Errick Samosa, Investigation on Case, pangabubho ang gituohan nila nga hinungdan sa pagkutlo sa kinabuhi niini.
Ang patay nga lawas sa biktima anaa na kini karon sa punerarya ug ipaubos pa kini sa autopsy aron masuta kung wala ba kini foul play.(/IBM)(BANATNEWS)