Abrugena: Relasyon sa CCPO ug CPPO mas nilig-on

CEBU, Philippines – Ang relasyon sa Cebu Provincial Police Office (CPPO) ug Cebu City Police Office (CCPO) giingong mas nilig-on pa human sa nahitabong “misencounter” tali sa mga operatiba sa Provincial Intelligence Branch ug ni Police Corporal Feliciano Yballe, Jr.

Kagahapon nibisita si CPPO director Police Colonel Manuel Abrugena sa buhatan sa direktor sa CCPO nga si Police Colonel Royina Garma.

Giklaro ni Abrugena nga kabahin sa preparasyon sa eleksiyon ang ilang gihisgutan.

“Nag-coordinate po ako sa ating city director kasi merong mga series of activities po kami na in connected ang Cebu Province and City of Cebu sa papalapit na eleksiyon”’ butyag ni Abrugena.

Giklaro usab ni Abrugena nga wala naguba ang ilang relasyon sa pagkamatay ni Yballe.

“Kung gaano po kahigpit ang aming brotherhood noon, mas pinatitibay po namin ngayon dahil sa kumakalat na balita”, padayag ni Abrugena.

Sayo pa, ang Police Regional Office-7 nipadayag nga ‘misencounter’ ang pagkamatay ni Yballe kini human giingong una kining nagpabuto sa iyang armas ngadto sa mga operatiba nga giingong nanuktok sa iyang balay aron lang magpagiya sa Barangay Sinsin.

Sa Barangay Sinsin gikatahong nagtago ang suspek nga nibanhig patay sa operatiba sa PIB nga si Police Master Sergeant Junard Cinco diha sa Barangay Media Onse, Dakbayan sa Toledo niadtong Abril 30 sa buntag.

Gihimakak sa kapolisan nga si Yballe maoy suspek pagpatay kang Cinco ug giingong hangtud karon padayon pa nga nagtago-tago ang kriminal. (/BDB)(BANAT NEWS)