Bana ug negosyo gisubay sa kamatayon sa ginang

CEBU, Philippines – Gisubay karon sa mga imbestigador sa Cebu City Police Office ang mga kalihokan sa wala pa igkita nga bana ug ingon man negosyo sa kamatayon sa 46-anyos nga babayeng negosyante kinsa gipusil patay sud sa iyang opisina diha sa Maria Luisa Road, Banilad Cebu City niadtong Huwebes.

Si Police Colonel Royina Garma- director sa CCPO nitug-an sa mga tigbalita kagahapon nga naghimo na sila og case conference bahin sa kaso sa pagpatay kang Primegilda Quirante.

“Titingnan if it has something to do with business, or the activities of the husband. Ginagawa pa namin ang background,” matud ni Garma.

Apil unya sa ilang ipatawag ang mga empleyado sa biktima ug ang bana sa namatay nga hangtud karon missing pa gihapon.

Gibutyag ni Garma nga nidangop sa National Bureau of Investigation-7 ang biktima aron ipahibalo nga na-missing ang bana niini.

Matud pa niya nga nigawas sa ilang imbestigasyon nga adunay giingong mga “questionable withdrawals” sukad nga nahanaw ang bana niini.  “She reported daw that the husband is missing and may withdrawals na questionable since na-missing,” matud ni Garma.

Sa pakighinabi sa The Freeman/Banat News kang NBI-7 Director Tomas Enrile gikompirmar niini nga niduol kanila si  Primegilda kuyog ang ig-agaw ni kanhi Department of Justice Secretary Vitaliano Aguirre III aron pangitaon ang iyang bana.

Wala hinuon masayod si Enrile bahin sa “questionable withdrawals” nga gibutyag sa kapolisan.

“She was here the morning before her death, na-shock din kami na malaman na napatay siya on that day. For now we will monitor and leave it to the police to investigate the case,” matud ni Enrile.

Gipusil patay si Primegilda sa lalaking nagsuot og full-faced helmet sa sud sa opisina niini diha sa Summit Granite Center. Diha sa iyang tupad ang igsuon niining babaye atol sa pagpamusil.

Wala na siya makaabot nga buhi sa tambalanan tungod sa upat ka samad pinusilan sa iyang kalawasan.

Naghimo karon og background investigation sa magtiayon ang kapolisan.(/IBM)