Kristo himuong inspirasyon taliwala sa kalisdanan

CEBU, Philippines — Sa pagsaulog Pasko sa Pagkabanhaw ni Hesukristo, naglaum si Cebu Archbishop Jose Palma nga ang mga Katoliko himuon untang  pagtulun-an ang gihimo niini dinhi sa kalibutan.  

Gihimug-atan ni Palma nga ang Pasko sa Pakabanhaw magsilbi untang sumbanan sa katawhang Katoliko nga giantos ni Kristo ang mga kasakit ug wala kini makapausab sa iyang pagtuo nga maangkon gayod niya ang kalampusan nga mao   ang pagkabanhaw human sa iyang kamatayon.

Gitataw sa arsobispo nga ang kamatayon ni Hesukristo, magsilbi untang giya sa mga Katoliko sa pagpalig-on pa sa ilang pagtuo bisan pa man sa mga pagsulay  nga nahiaguman.

Matud ni Palma nga ang kamatayon ni Kristo maoy paagi nga matubos sa kasal-anan ang katawhan ug maoy nagpalig-on sa pagtuo.

“The triumph of light over darkness, the success of goodness over evil, the victory of forgiveness over condemnation, and the conquest of love over hate and of life over death,” dugang pa niya.

Si Palma kinsa miselbrar sa Easter Mass sa Cebu Metropolitan Cathedral miawhag usab sa mga magtutuo nga himuong inspirasyon ang pagkabanhaw ni Kristo ilabi na sa atong nasud nga makabaton na og kausaban.

Iyang panawagan sa mga magtutuo sa pagtalikod na sa ilang mga nahimong kalapasan ug magbag-o aron usab makahimo sa pagtabang diha sa mga komunidad.

Kang nagsingabot na ang eleskyon, gilakbitan usab sa arsobispo ang mga politiko nga magpapili nga mahimong dalan alang sa kausaban ug kaayohan sa nasud. (Rowena D. Capistrano/DILT)(BANATNEWS)