CEBU, Philippines – Walay nagpositibo nga drayber ug ingon man konduktor nga gipaubos sa kinalit nga drug test niadtong Lunes sa Cebu South Bus Terminal (CSBT).
Miabot sa 179 ka mga drayber ug konduktor ang gi-screen pinaagi sa joint operation sa Philippine Drug Enforcement Agency (PDEA), Philippine National Police, Land Transportation Office, Land Transportation Franchising and Regulatory Board (LTFRB) ug sa Kapitolyo. Si Jonathan “Joy” Tumulak ang operations manager sa CSBT nagkanayon nga positibo kini nga balita alang sa mga pasahero.
“At least ang result unya sa PDEA, angay nga mokompyansa (ang mga pasahero) kay safe ang mga drayber sa mga sakyanan nga ilang gisakyan”, butyag ni Tumulak. Wala na usab mahibulong si Tumulak nga magnegatibo ang resulta sa screening sanglit nagsilbi na nga leksyon ang resulta sa drug test niadtong Pebrero diin tulo ka drayber ang nagpositibo ug naaksyonan na kini sa operator.
Ang operations manager sa CSBT miawhag gihapon sa mga bus operators nga kinahanglan luwas ang mga sakyanan nga mobiyahe. Matud ni Tumulak nga angay nga susihon daan ang mga ligid, signal lights ug uban pang parte ug kondisyon sa bus aron paglikay sa disgrasya.
Karong adlawa gikatakda nga mohimo og inspeksyon si Gobernador Hilario Davide III sa CSBT. (/DILT)(BANAT NEWS)