Nalatayan sa mixer
CEBU, Philippines – Patay ang usa ka lalaking nagmotor human nalatayan og cement mixer truck diha sa Cebu South Coastal Road sa Dakbayan sa Sugbo kagahapon sa buntag. Giila sa kapolisan ang nakalas nga si Gemson Tampus Luchavez ,30, taga Barangay Poblacion, Dakbayan sa Talisay, nagmaneho og motorsiklo nga may plakang 6414 OT. Samtang ang nagmaneho sa cement mixer truck nga may plakang ABG 4760 mao si Abundio Tampipi, 41, residente sa Barangay Campo 7, Minglanilla.
Base sa inisyal nga imbestigasyon ni Police Corporal Paul Dennis Traya, nagsubay ang duha sa SCR paingon sa habagatan.
Si Luchavez anaa nagsubay sa edge lane duol sa gutter ug sa wala niini mao ang truck ni Tampipi. Dihang naabot ang duha sa kurbadahong bahin giingong nasabod sa maong trak ang manobela ni Luchavez hinungdan nga nawagtangan kini og kontrol ug natumba ug naligsan ang ulo niini.
Si Tampipi nangangkon nga si Luchavez maoy misabod sa iyang trak kay mi-break kini.
“Nakita sa side mirror nga nagwara-wara iyang motor, pag break nako nasabod siya. Nasud siya nalatayan gyud siya, niuntol gud ang sakyanan,” sigun ni Tampipi.
Kasong reckless imprudence resulting to damage to property and homicide ang atubangon ni Tampipi. (/IBM)(BANAT NEWS)
- Latest
