Gitanyag nga debate gisanong ug gibalibaran

CEBU, Philippines – Gipasabot ni Cebu City Mayor Tomas Osmeña nga ang pagdawat niya sa hagit sa Integrated Bar of the Philippines (IBP) – Cebu City Chapter usa ka kahigayonan nga dugay na niyang gihuwat.

Mao kini ang pamahayag sa mayor dihang gipangayuan siya og komento labot sa pagbalibad ni kanhi mayor Michael Rama sa hagit sa IBP – Cebu City Chapter kay matud ni Rama, kang Osmeña ra sab kini niya nakat-onan nga dili moapil og mga debate kon nasayod nga ikaw ang nag-una sa survey.

“Yeah, that’s true but you know in this particular case my motivation is different because this is my chance I’ve been waiting for. So, forget what I said, I know I’m ahead I don’t have to know, you know I’m ahead”, ni Osmeña pa.

Dugang niya nga mao kini ang tsansa nga ma-expose ang mga dagkong kompaniya nga una na niyang gigukod kay giingong malapason sa balaud sa siyudad.

Kahinumduman nga gawas kang Osmeña, lakip sa midawat sa hagit sa debate mao ang iyang running mate nga si Konsehal Mary Ann de los Santos.

Alang sa mayor nga ang pagbalibad ni Rama, pildi na kining daan ug dili kini modaug sa iyang gigikanan nga distrito.

Sa Dakbayan sa Mandaue, misanong na ang kampo ni Mayor Luigi  Quisumbing apan mibalibad ang kampo ni Sixth District  Congressman  Jonas  Cortes ang kaatbang pagka-mayor ni Quisumbing karong umaabot nga piniliay.

Nunot niini, gitawag nga talawan sa kampo ni Quisumbing si Cortes. Apan matud sa kampo sa kongresista pinaagi ni Atty. Jamaal Calipayan kini mi-post diha sa social media, kini nagkanayon nga siya ang mitambag kang Cortes nga dili nalang mosalmot og debate.

Iyang gipasabot nga unsa may debatehan nga wala may dagkong isyu sa dakbayan ug walay angay pamatud-an si Cortes ngadto sa mga botante.

“I believe that debates are only necessary when there are pertinent issues to be resolved. Our camp has nothing to prove.” tipik sa post ni  Calipayan.

Si Atty. Elaine Bathan, ang chief of staff ni Quisumbing, miingon nga  ang debate maayo nga paagi alang sa paglamdag sa kaisipan sa mga botante  ug sa pag-ila sa mga kandidato kon si kinsa gyud kanila ang adunay maayo nga baruganan sa isyu ug pangalagad ngadto sa katawhan.

Hinuon si  Calipayan miingon nga dili tinalawan ang pagdumili nila sa debate kay  wala sila nagkinahanglan og dugang publicity.

Apan ang tubag ni Bathan mao nga ang katawhan angay lamang hatagan og igong kasayuran bahin sa mga plataporma sa mga kandidato. (Romeo T. Limpangog/DILT)