13 ka balay naugdaw
CEBU, Philippines — Naugdaw ang 13 ka balay sa nahitabong sunog sa Sitio Guiwanon, Barangay Looc, Dakbayan sa Lapu-Lapu alas 8:36 ang takna sa miaging Sabado sa gabii.
Matud pa ni Senior Fire Officer 1 Zener Seno, sa Lapulapu City Fire Station, gibana-bana nga moabot sa P420 mil ang danyos niini.
Ang kabomberohan miisa dayon sa alarma ngadto sa Task Force Alpha aron makatabang ang ubang kabomberohan gikan sa Dakbayan sa Mandaue, Cordova.
Alas 10:10 sa gabii nakontrolar ang sunog. Sa pasiunang impormasyon nga nahipos sa kabomberohan giingong nagsugod ang sunog sa panimalay sa usa ka Efipanio ug Jessica Patalinghug apan wala pa masuta ang hinungdan niini.
Si Looc Barangay Kapitan Regina Ybañez miingon nga ang sagad sa mga panimalay nga nasunog ginama sa light materials, naglisod sab ang mga bombero tungod sa kahagip-ot sa agianan. (Rowena D. Capistrano/IBM)(BANATNEWS)
- Latest
