CEBU, Philippines — Gitinguha karon ni San Fernando Mayor Lakambini “Neneth” Reluya nga pasakaan og kasong libel ang iyang kaatbang pagka-mayor sa umaabot piniliay nga si Ruben Feliciano human kini namasangil kaniya nga usa ka drug protector.
Si Reluya nagkanayon nga dugay ra niyang gibaliwala ang mga banat ni Feliciano batok kaniya.
“I will not stoop at his level” matud sa mayor atol sa sidelight sa campaign caravan sa Hugpong ng Pagbabago kagahapon sa Lungsod sa Liloan.
Si Feliciano nga usa ka port developer sa wa pa kini milansar sa San Fernando namasangil kang Reluya nga usa ka drug protector
Si Reluya usab mihagit kaniya nga pamatud-an ang maong pasangil.
“Put substance to your claim. Put substance to your allegation” matud ni Reluya kinsa mihulagway usab kang Feliciano nga “stupid” ug “crazy”.
Hagbay ra nga nagbangi ang duha human nga wala tugoti ni Reluya ang proyekto nga pantalan ni Feliciano sa Brgy. Sangat.
Una nang mihingalan si Reluya kang Feliciano nga usa sa mga tawo nga nagpaluyo sa pagpamanhig kaniya nga miresulta sa kamatayon sa iyang bana ug duha niya ka staff niadtong Enero 22. Gihimakak kini ni Feliciano ug nagkanayon nga propaganda lang kay panahon sa eleksyon. (/DILT)(BANATNEWS)