Piggery gireklamo ngadto sa buhatan sa Presidente

CEBU, Philippines — Usa ka environmental advocate sa Lungsod sa Alegria, Lalawigan sa Sugbo ang 13 ka tuig na nga nagreklamo sa usa ka dakung piggery sa Barangay Madridejos, ang mipadangat sa iyang sentimento ngadto sa presidente mismo.

Si Elizabeth Lopez, misuwat kang Presidente Rodrigo Duterte niadtong Pebrero 26, 2019 kay gusto siya nga makighinabi niini aron masulbad ang problema nga gisagubang sa ilang komunidad sama sa giingong grabeng baho gikan sa maong piggery.

Pasangil ni Lopez nga mobaha pa gani ang tubig nga nagdala og hugaw sa mga baboy ngadto sa kasikbit nga kabalayan ug maabot kini ngadto sa dagat o ang Tañon Strait nga usa ka protected seascape.

“Ako si Elizabeth Lopez mahal namo nga President, ako ug akong mga kasilinganan diri sa Balhaan, Madridejos, Alegria, Cebu magahangyo nga imo ming mahatagan og panahon nga maka-istorya ka (sa) personal, para sa among problema diri sa among dapit,” matud ni Lopez sa iyang sulat.

Siya usab mipasangil nga wala nagpakabana ang mga lokal nga opisyal ug ayum-ayum lang ang gihimo maong nakahunahuna siya nga modangop na sa presidente.

“Baho kaayo among palibot ug naay pollution sa tubig, hasta among dagat naapektuhan na,” dugang sa iyang sulat.

Ang maong sulat adunay stamp nga nadawat kini sa Office of the President sa Malacañang, pinaagi sa Office of the Special Assistant to the President niadtong susamang adlaw sa Pebrero 26.

Si Lopez miangkon usab nga gikiha na gani siya sa tag-iya sa maong piggery ug bisan unsang kaso apan lig-on gihapon ang iyang baruganan nga kinahanglang resolbahon ang problema nga nakaapekto sa komunidad.

Siya usab mitaho nga aduna nay bata kinsa nagpuyo duol sa piggery nga namatay niadto lang Pebrero tungod sa pneumonia.

Mipasabot kini nga dili siya mobatok og bisan unsang negosyo apan kinahanglan nga tarungon lang unta kini pagdala nga dili mabutang sa peligro ang katawhan ug ang kalikupan.

Kini mipadayag nga niadto pang tuig 2006 sa bisan unsang opisina sa mayor sa duha na ka administrasyon, sa Department of Environment and Natural Resources-Environmental Management Bureau, sa Provincial Environment and Natural Resources Office, ug sa mga nagkalainlaing estasyonan sa radyo na siya nagpalaban.

Nasagmuyo siya nga padayon gihapon ang katilingban nga nag-antos sa maong problema kay sa iyang alegasyon nga adunay nagpaluyo ug nanalipod nga politiko sa maong pig farm.

Matud niya nga ang maong pig farm maoy kinadak-an sa Alegria nga makaakomodar og tres mil ka baboy. (BANAT NEWS)