BFP sa Talisay nihangyo mohuwam sa water tanker
CEBU, Philippines — Nihangyo ang kabomberohan sa Siyudad sa Talisay nga unta ilahang huwaman ang water tanker nga iya sa dakbayan o ba kaha diha lang una mag-standby sa ilang sub -station sa Barangay Poblacion. Kini gumikan kay ang ilang fire truck ilahang gipaayo ug wala pa mabalik.
Si Senior Fire Officer 1 Guiller Pegarido sa Talisay City Fire Station nagkanayon nga ilaha nang gihangyo ang siyudad labot niini apan wala pa sila’y tubag nga nadawat.
Matud ni Pegarido nga basin og mataud-tauran pa ang ilang gipaayo nga firetruck ug nabalaka sila nga aduna unya’y alarma sa sunog diha duol sa Poblacion unya dili sila makaresponde.
Si Pegarido nagkanayon nga ang water tanker back up lang kini sa firetruck panahon sa sunog ug makatabang usab kini sa pagpasirit kon gikinahanglan tungod kay kusog man usab ang pressure niini.
Sa pagkakaron, ang water tanker anaa sa buhatan sa City Disaster Risk Reduction and Management diin gigamit usab kini sa maong buhatan sa paghatag og ayudang tubig ngadto sa kabukirang barangay sa siyudad. Matud ni Pegarido nga unta kong mahimo kon walay biyahe ang maong sakyanan anha kini ipundo sa ilahang sub-station.
Gipaabot usab sa kabomberohan ang saad ni Mayor Eduardo Gullas nga sila hatagan og duha ka penetrator fire truck diin tabang usab kini sa ilang buhatan panahon nga adunay emerhensiya. (BANAT NEWS)
- Latest
