Daluz mobalik na sa katungdanan

CEBU, Philippines — Sukwahi sa mga nangaging taho, si Cebu City Councilor Jose Daluz III mobalik na sa iyang trabaho ugmang adlawa human matapos ang unom ka buwan nga suspension gumikan sa giingong dili ma-esplikar niya nga katigayunan. Si Daluz mismo ang mikumpirmar niini kinsa midugang nga dili na kinahanglan nga pahibaw-on ang Department of the Interior and Local Government (DILG) sa iyang pagbalik apan iya hinuong pahibaw-on ang presiding officer sa konseho sa siyudad nga si Bise Mayor Edgardo Labella. “Because March 19 man ang session. Dili na diay ko mo-inform sa DILG. I just have to write vice mayor Labella that I have served time,” matud ni Daluz.

Kahinumduman nga una nang mipahibawo si DILG-Cebu City officer-in-charge, Emma Joyevelyn Calvo nga dili na sila mo-isyu og assumption order.

Pipila nalang ka buwan isip sakop sa konseho, si Daluz misaad nga moapil sa tanang himuon nga deliberasyon. Sa umaabot nga piniliay, dili na siya magpapili kay siya medisisyon nga mahimong campaign manager sa Partido-Barug, ang local nga partido ni kanhi mayor Michael Rama.

Sa pagbalik unya ni Daluz, ang konseho langkuban na og 10-8, diin mas daghang konsehal ubos sa Bando Osmeña Pundok Kauswagan.Kahinumduman nga niadtong Septiyembre 17, 2018, gipatuman sa DILG ang suspension order nga gi-isyu sa Office of the Ombudsman batok ni Daluz human kini mapamatud-i nga guilty gumikan sa ‘serious dishonesty’ diin naglisod kini og esplikar sa pagtaas sa iyang personal properties sa iyang Statements of Assets Liabilities and Networth (SALN) nga iyang gi-file niadtong tuig 2017.

Apan sa petisyon alang sa certiorari sa Court of Appeals nga iyang giduso niadtong Septiyembre 18, 2018, iyang gi-eksplikar nga ang kalit nga pagtaas sa iyang katigayunan mao ang mga propeyedad nga iyang nasunod sa iyang inahan. (gikan sa The FREEMAN/DILT)