Tanan gi-awhag sa pag-ampo batok dautan

CEBU, Philippines – Ang tigpamaba sa Archdiocese of Cebu ug pangulo sa Commission on the Laity, malaumon nga ipadayon ug ampuon ang deliverance prayer tungod sa taas nga pwersa sa dautan nga mikatap sa katilingban.

Si Msgr. Joseph Tan, ang tigpamaba sa simbahan miingon nga daghang krimen ang nahitabo, apan ang kaso ni Christine Silawan, binuhatan sa yawa.

Wala niya gisalikway ang posibilidad nga binuhatan kini sa kulto isip kabahin sa ilang ritwal mao nga alang niya kinahanglan gayud ang pag-ampo alang sa biktima, pagkab-ot sa hustisya sa iyang kamatayon ug kalinaw sa nagbangutan niining pamilya.

Nunot niini, gipahinumdum ni Tan ang giluwatan nga circular sa mitaliwan nga si Cebu Archbishop Emeritus Ricardo Cardinal Vidal sa pag-ampo kang San Miguel Arkanghel batuk sa mga dautan diha sa mga santos nga misa.

Giawhag niini ang mga simbahan nga himuon ang maong deliverance prayer karon panahona alang sa pagpanalipod sa lihok sa mga dautan. Mipadayag sa iyang suporta sa maong awhag ni Tan ang chairman sa Commission on the Laity nga si Fe Barino kay makatabang ang pag-ampo sa pagsalikway sa mga dautan.

Dugang niya nga angay magmabinantayon kanunay sa paglakaw ug diha sa panimalay kay bisan asa anaa ang mga dautan nga makita ug dili makita. (/DILT)(BANAT NEWS)