CEBU, Philippines – Gikataho nga tulo ka mayor nga kaalyado nila ni Bise Gobernador Agnes Magpale ug Gobernador Hilario Davide III ang mibalhin sa kampo nila ni gubernatorial candidate Gwendolyn Garcia human nga gipanghulga nga pasakahan og kaso.
Si Magpale nagkanayon nga ang tulo ka mayor kasagaran taga amihanang Sugbo ang personal nga misulti kanila kalabot sa maong pagpanghulga.
“I think that’s unfair to win the votes of the Mayor… Ang uban giingnan nga balhin diri namo, dili ka namo pakontrahan” butyag sa bise gobernador.
Si Magpale midagan pagka-gobernador ubos sa iyang partidong BAKUD diin iyang makaatbang si kongresista Gwendolyn Garcia nga maoy standard bearer sa One Cebu party.
Ang Banat News, misuway og kontak kang Garcia alang sa iyang habig, apan wala pay nadawat nga tubag sa pagsulat niining maong balita. Si Magpale nagkanayon nga dili na usab sila kinahanglang mohimo og “loyalty check” sa ilang mga kaalyado kay nagtuo siya nga solid gihapon ang ilang grupo. (/DILT)(BANAT NEWS)