Dugang duha ka bata patay sa tipdas
CEBU, Philippines – Miabot na sa 36 porsiyento gikan sa kinatibuk-ang target sa Department of Health - Center for Health Development - Central Visayas ang ilang nabakunahan batuk sa sakit nga tipdas.
Gitug-an ni Dr. Jeanette Pauline Cortes, Medical Officer IV sa DOH-CHD-7 nga nakahatag na sila og bakuna ngadto sa 135, 299 ka mga indibidwal ang ilang buhatan diin 36 porsiyento kini sa kinatibuk-ang mabakunahan nga anaa sa 371,197.
Ang pagpamakuna sa mga tunghaan sa matag lalawigan, nakatabang kini sa pagsaka sa gidaghanon sa mga nagpabakuna batuk tipdas sa rehiyon.
Ang hepe sa Local Health Support Division nga si Dr. Jonathan Neil Erasmo miingog nga ang nahitabong outbreak, usa kini ka wake-up call alang sa mga ginikanan kun unsa ka importante ang pagpabakuna sa ilang mga anak. Padayon gihapon ang ilang misyon dili lamang sa mga bata apan lakip na usab ang mga edaran diha sa ilang mga vaccination post nga molungtad karong buwana.
Sa ulahing datos sa DOH-CHD-7, adunay duha ka bata gikan sa Dakbayan sa Sugbo ang nadugang sa listahan nga namatay gikan sa unom nga unang namatay tungod sa tipdas.
Ang duha ka mga batang babaye ug lalaki nagpangidaron og 2-anyos paubos nga namatay sa komplikasyon sa tipdas nga mao ang pneumonia.
Ang kakuwang sa kahimsog sa mga bata maoy laing hinungdan sa ilang kamatayon rason nga dali ra silang nataptan og sakit. (BANAT NEWS)
- Latest
