CEBU, Philippines — Mokabat ngadto sa P500 ang multa sa mga tag-iya og iro nga pasagdan lang ang ilang mga binuhi nga makagawas sa panimalay nga walay higot.
Base kini sa Akta Republika 9482 kun “Anti-Rabies Act of 2007” diin gipahimangno sa Animal Bite Center sa Probinsiya sa Sugbo karong bulan sa Marso ang Rabies Awareness Month.
Sa maong balaod, P500 ngadto sa P1,000 ang lukat sa iro nga madakpan gikan sa Bantay Rabies sa Barangay ug P2 mil usab kon pakyas ang tag-iya pagparehistro sa iro aron pabakuna ug laing P2mil kon pakyas pagpahibalo ang tag-iya ngadto sa otoridad kon nakapaak ang binuhi niini.
Matud ni Dominic Tanipez, nurse ug rabies coordinator nga sa Probinsiya sa Sugbo padayon ang pagsaka sa kaso sa mga napaakan sa iro.
Base sa record sa Animal Bite Center sa Kapitolyo niabot ngadto sa 17, 249 ang kaso sa napaakan sa iro sa probinsiya sa tuig 2013 nikabat sa 20, 796 sa tuig 2014; nikabat sa 23, 629 sa tuig 2015; sa tuig 2016 adunay 24, 701 ka kaso samtang sa tuig 2017 adunay 29, 591; ka kaso ug 29, 507 tuig 2018.
Sa niaging tuig siyam ang patay tungod sa rabies sa tibuok probinsiya walay labot sa Dakbayan sa Sugbo.
Si Tanipez nagkanayon nga importante nga mapabakunahan ang mga iro aron dili delikado kong makapaak kini.
Iyang giawhag ang mga tag-iya nga pabakunahan ilang binuhi ngadto sa mga veterinarian's office sa mga lungsod ug dakbayan diin libre kini.
Si Tanipez nipadayag nga usa sa ilang problema ang mga libudsuroy nga mga iro diin kasagaran maoy makapaak ug delikado kaayo tungod kay walay nag-atiman.
Ang kapolisan sa matag lungsod ug siyudad giawhag ni Tanipez nga motabang sa pagpatuman sa Anti-Rabies Act. (BANAT NEWS)