Kwaresma 2019 magsugod ugma

CEBU, Philippines — Si Cebu Archbishop Jose Palma subling mipahinumdum sa mga magtutuo nga ugmang adlawa mao ang Miyerkules sa Badlis nga maoy sinugdanan sa panahon sa Kwaresma o Lent Season.

Matud ni Palma nga ang Kwaresma, 40 ka adlaw kini nga pagpangandam una pa ang Semana Santa. Panahon kini sa pamalandong sa kasakit, pag-antos sa kamatayon ug pagkabanhaw ni Hesukristo.

Sumala sa arsobispo nga atol sa Miyerkules sa Badlis, adlaw kini sa pagpuasa diin ang nag-edad og 16-anyos hangtod 60-anyos nga tumutuo giawhag sa pag-obserbar niini pinaagi sa pagkaon lang og gamay. Sa maong adlaw sab gidili ang pagkaon sa karneng baboy, baka ug manok. Kini isip pagpakita sa espiritu sa Kwaresma kon prayer fasting o almsgiving, pag-ampo usab alang sa pagpugong sa tawhanong kagustohan.

Dugang ni Palma, tukma usab ang pagpaambit sa mga kaayohan ngadto sa mas labing nanginahanglan.

Gipahinumduman usab ni Palma ang katawhan niining panahona nga dili kini panahon sa paghudyaka ug pagbakasyon, kay kini ang panahon sa pag-apil-apil sa mga kalihukan sa simbahan. (BANAT NEWS)