Gibansay og forensics didto sa Korea

CEBU, Philippines — Mga imbestigador sa rehiyon siete gipaubos gibansay sa Korean Police National Agency kabahin sa forensic investigation nga gipahigayon didto sa Korea.

Nagsugod ang maong training niadtong Pebrero 18 ug nahuman pagka Marso 1, 2019. Ang mga imbestigador sa Crime Laboratory sa Visayas ug Mindanao maoy  gipaapil sa maong dose ka adlaw nga training.

Gibutyag ni Police Brigadier General Debold Sinas, direktor sa Police Regional Office-7 nga ang maong training gipangulohan ni Senior Superintendent Lee Kyung Ja, direktor sa International Cooperation Division- Foreign Affairs Bureau sa Korean National Police Agency.

Gawas sa training, hatagan usab sila og mga bag-ong forensic training kits nga gigamit didto sa Korea.

Subay kini sa gihimong exchange program tali sa Korean National Police Agency ug sa Philippine National Police. Apil sa maong programa ang paghatag og patrol cars, motorsiklo ug forensic kits sa KNPA ngadto sa PNP.

Kahinumduman nga niadtong Oktobre 15, 2018, pormal nga gihatag ni Korean Consul General Oh Young Hun ang 25 ka sakyanan gikan sa KNPA nga gamiton nga patrol cars sa kapolisan.

Wala pa hinuon maabot ang gisaad niini nga 140 ka motorsiklo.

Sigun sa tigpamaba sa PRO-7 nga si Police Lieutenant Colonel Maria Aurora Rayos nga atol sa graduation sa mga imbestigador, pormal nga giturned-over sa KNPA ang upat ka set sa forensic kit alang sa Crime Lab sa rehiyon. (/DILT)(BANATNEWS)