CEBU, Philippines — Gidepensahan sa Police Regional Office in Central Visayas (PRO-7) ang kapolisan sa Dakbayan sa Talisay ug gihulagway nga maayo kaayo ang ilang labok sa kampanya kontra ilegal nga drugas, sukwahi sa pamahayag ni Presidente Rodrigo Duterte niadtong miaging adlaw..
Si Duterte kinsa nitambong sa pagpanghatag sa financial grants pinaagi sa Unconditional Cash Transfer program sa Department of Social Welfare and Development (DSWD) nihulagway nga wala pa gihapoy kalamboan ang Talisay City.
“Wa’ gyud na mo improve na’ng Talisay... Kaning Cebu wala gyud moubos ang duwa sa druga. There will be a time na maabtan ta gyud mo (drug offenders),” bahad pa ni Duterte.
Apan si Chief Superintendent Debold Sinas, director sa PRO-7 sa press conference kagahapon nagkanayon nga niubos og 70 porsiyento ang illegal-drug situation sa Talisay.
Nagpasabot kini nga gamay nalang ang high-value targets ug drug pushers karon kun itandi sa miaging tuig.
Matud ni Sinas gitutokan gyud nila ang Talisay City batok sa ilegal nga drugas dinhi sa Sugbo.
“The situation worsened, but nag-improve na - no changes will be made sa Talisay Police Station. But we will have another round of assessment and continue to do our best,” matud pang Sinas.
Sugod niadtong bulan sa Hulyo sa miaging tuig sa paglingkod ni Sinas gisugdan dayon ang anti-criminality Synchronized Enhanced Managing Police Operations o One Time Big Time diha sa Talisay City.
Sukad niadto, paspas na ang operasyon batok sa ilegal nga drugas ug gikahimuot kini ni Sinas.
Si Superintendent Marlu Conag, ang hepe sa Talisay police wala maapektohi sa pamahayag sa pangulo.
“This current situation only means that if the TOP level of government are really serious in the campaign against illegal drugs, it trickles down to the last police officer on the ground,” si Conag nagkanayon.
Sa laing bahin, padayon ang pagpangita kang self-confessed drug lord Franz Sabalones human duna silay nadawat nga intelligence information nga nibalik na kini sa negosyo sa ilegal nga drugas karong panahon sa eleksyon.
Matud pang Sinas nga kun madakpan si Sabalones maputol gyud ang iyang operasyon nga gikonsiderar nga kinadak-ang drug group sa habagatang bahin sa Sugbo.
“If Sabalones is pinned we think that the drug situation in Talisay and San Fernando might also improve. His network is very much alive, and now nag resurgence na sila due to elections,” dugang pa ni Sinas.
Gibutyag usab ni Sinas nga ang gipatay nga si San Fernando Councilor Alfonso Donaire, 37, didto sa Zamboanga sa miaging semana konektado sab kang Sabalones. Si Donaire ang ikalimang opisyal sa maong lungsod nga gipatay. (/IBM)(BANATNEWS)