CEBU, Philippines — Mohatag sa ilang suporta ang grupong Alayon ngadto nila ni kongresista Gwendolyn Garcia ug ni Daphne Salimbangon nga magpapiling gobernador ug bise gobernador karong piniliay sa buwan sa Mayo.
Kini maoy gipahibawo ni Mayor Eduardo Gullas sa Siyudad sa Talisay, kinsa modagan pagka kongresista sa unang distrito isip hulip sa iyang apo nga si kongresista Gerald Anthony “Samsam” Gullas kinsa magpapili sab pagkamayor sa Talisay.
Si Mayor Gullas miingon nga si Samsam na karon ang nagdala sa ilang grupo ug mihunghong kanilang mga mayor nga si Garcia ang ilang paluyohan lakip na si Salimbangon.
“I will follow what he says. I’m glad nga si Samsam is organizing everything,” asoy pa ni Gullas.
Una niini, si Mayor Gullas miingon nga mosuporta sila sa pito ka kandidatu pagka senador sa partidong PDP-Laban nga mao sab ang mga manok ni Presidente Rodrigo Duterte.
Sa pangutana kon mohangyo si Duterte nga suportahan ang kaatbang sa GaSa nga sila si bise gobernador Agnes Magpale ug gobernador Hilario Davide III, si Gullas mitubag nga mag-agad ra siya kang Samsam.
Nabantayan nasab nga pipila ka mga higayon mouban sa mga lakaw sa Alayon sila si Garcia ug Salimbangon. DILT (BANATNEWS)