PWD nagprotesta batok diskriminasyon

CEBU, Philippines – Gipakita ang hiniusang kusog sa mga pangulo sa nagkadaiyang kapunongan nga sakop sa Federation for the Welfare of Persons with Disability sa kabarangayan sa Dakbayan sa Mandaue pinaagi sa pagpirma og manifesto ug pagdagkot og kandila kagahapon.

Ila kining gihimo subay sa ilang tinguha nga unta maablihan ang mga hunahuna ug malamdagan ang kaisipan sa publiko ug hunongon na ang cyberbullying ngadto kanila nga mga PWDs.

Ang federation president nga si Joseph Jomantoc miingon nga gihimo nila kini subay sa ilang nadawat nga sulat gikan sa ilang sakop nga si Michael Pielago kinsa naputos og pagbugalbugal diha sa social media.

Nagsugod ang pag-bully kang Pielago human siya misang-at og kaso sa buhatan  sa Ombudsman Visayas batok kang  Mayor Luigi Quisumbing human siya gibalhin sa mayor ngadto sa laing buhatan nga iyang gitataw nga dili haum kaniya isip usa ka PWD.

Gitataw ni Pielago nga naglisod siya sa pagtuman sa matag adlaw niyang gimbuhaton sanglit  ang buhatan nga iyang gibalhinan mao man ang pag-atiman sa kabataan sa kabarangayan ngadto na sa Housing and Urban Development diin ang buhatan anaa mahimutang sa ikaduhang andana sa edipisyo sa kagamhanan. (/DILT)(BANAT NEWS)