CEBU, Philippines – Si Third district representative Gwendolyn Garcia mihulagway nga ‘partial peace’ ra ang ilang gipirmahang peace covenant human nga duha ra ka buok ang mitambong sa ilang kontra partido nga gihimo diha sa Saint Francis of Assisi Parish, Dakbayan sa Naga.
Si Garcia, kinsa modagan pagka gobernador karong midterm election ubos sa One Cebu Party mipirma sa panaad.
Apan wala makatambong silang Cebu Provincial Governor Hilario ‘Junjun’ Davide III ug si Vice Governor Agnes Magpale gawas sa mga kaalyadong sila si Grecilda ‘Gigi’ Sanchez ug si Wilfredo Caminero nga mokandidato pagka board member ug congressman sa 2nd district.
“Partial peace ra kay kami, we are committed to that pledge but they are not around,” si Garcia nagkanayon atol sa ambush interview human sa pinirmahay. Mitambong sab si Talisay City Mayor Eduardo ‘Eddigul’ Gullas nga kandidato sa First District.
Ang hepe sa Cebu Provincial Police Office-Police Community Relations nga si Police Superintendent Virgilio Bayon-on nagkanayon nga gipadad-an nila og imbitasyon ang tanang magpapili sa midterm elections .
Si Sanchez, sa lahi nga ambush interview, nagkanayon nga si Magpale wala makatambong nunot sa nagtipun-og nga trabaho.
Si Davide sa iyang bahin mihimakak nga nakadawat kini og imbitasyon sa maong kalihokan kagahapon.
Si Davide ug Magpale didto kagahapon sa lungsod sa Alegria ug Malabuyoc alang sa pagapud-apod sa Kapitolyo og incentives lakip na pag turnover sa pipila ka proyekto ngadto sa maong mga lungsod.
Apan sumala pa sa direktor sa Police Regional Office-7 nga si Chief Supt. Debold Sinas nga mamahimo ra nga mobalik sa pinirmahay kadtong wala makatambong.
“It doesn’t matter at least we have started. Di man buot pasabot nga mag peace covenant kaisa lang. You could always do that again pwede man na until the time we can bring them in kay kung pugson nimo bisa’g ayaw man, it will frustrate everybody,” sigun sa heneral.
Misaksi ug mipirma sab sa maong peace covenant ang Central Command; kapolisan; media; Provincial Advisory Council; National Police Commission; ug Department of Interior and Local Government.
“It is highly hoped that you respect the peace covenant that you have sign to ensure the credible, honest and clean election. I urged the candidates to be sincere in what you have entered into, a violent free elections,” matud pa usab ni Jerome Brillantes, Provincial Election Supervisor sa Sugbo.( Le Phyllis Antojado/IBM)(BANAT NEWS)