Gikan mitan-aw og kalingawan, gipusil angol
CEBU, Philippines — Naangol ang usa ka tawo nga naglakaw lang human kini mitan-aw og kalingawan sa tinuig nga pangilin sa Brgy. Mactan sa Dakbayan sa Lapu-Lapu ala 10 pasado sa miaging gabii sa may Sitio Dapdap sa naasoy nga barangay ug siyudad.
Giila ni PO3 Erwin Senadjan sa Presinto 2 sa Lapu-Lapu City Police Office ang biktima nga si Francisco Aying, 53- anyos, minyo, usa ka wood carver.
Asoy sa polisa nga gikan nanan-aw og kalingawan ang biktima uban sa iyang asawa ug samtang sila naglakaw kalit lang usab mitumaw ang motorsiklo nga nagsunod kanila
Matud ni PO3 Senadjan nga ang motorsiklo mihunong ug ang angkas niini nga lalaki miibot sa iyang armas gikan sa iyang hawak ug namusil ngadto sa biktima.
Human mamusil, daling misakay ang wala mailhing mamumuno ug mipabulhot ang giluwanan niining motorsiklo samtang ang biktima nga naigo sa iyang tiil, daling gidala sa pribadong tambalanan sa Dakbayan sa Mandaue.
Gibutyag ni PO3 Senadjan nga dili pa nila matino ang hinungdan sa maong pagpamusil sanglit mohimo pa sila og dugang imbestigasyon alang sa pagsuta ug pag-ila sa maong mga lalaki nga nagpusil sa biktima. (/DILT)(BANATNEWS)
- Latest
