CEBU, Philippines – Andam ang Provincial Health Office (PHO) nga makig-coordinate ngadto sa Commission on Human Rights (CHR)-7 kalabot sa insidente sa Tuburan District Hospital nga nag-viral ang video sa usa ka lalaki nga giingong wala giatiman sa mga medical personnel sa maong tambalanan.
Matud ni Dr. Rene Catan, pangulo sa PHO nga bukas sila sa tanang imbestigasyon niini samtang sa ilang habig karon nagpadayon na ang ilang imbestigasyon sa maong insidente.
Tulo ka nurse ang gisuspenso human nikatap ang video ni Jimby Casas nga giingong usa ka drug personality ug napusilan human nisukol atol sa operasyon sa kapolisan diha sa Lungsod sa Tuburan.
Usa sa tulo ka nurse ang giingong nikuha sa video ug gi-share sa iyang kauban nga maoy posibleng ni-upload diha sa social media.
Ang maong tulo ka nurse gikatakdang ipatawag sa PHO sa umaabot nga Lunes.
Si Catan nipahimangno sa mga medical personnel sa tanang provincial ug district hospitals sa Sugbo nga gidili ang pagkuha og hulagway o video sa mga pasyente niini tungod kay kalapasan kini sa Data Privacy Act ug manubag ang maong mga nurse.
Si Catan nagkanayon usab nga bisan sa pagkomento sa mga medical staff sa social media kalabot sa ilang trabaho wala usab sila tugoti niini.
Sayo pa, ang PHO nihimakak sa pasangil nga wala giatiman sa mga medical staff ang pasyente.
Samtang ang direktor sa Police Regional Office (PRO)-7 Chief Superintendent Debold Sinas nagkanayon nga ilahang susihon kon aduna ba’y kalapasan ang kapolisan sa gipahigayong buy-bust operation niadtong Pebrero 8 diha sa lungsod sa Tuburan.
Ug giklaro ni Sinas nga lehitimo ang maong operasyon sa kapolisan. (Marjory D. Enriquez /BDB)(BANAT NEWS)