Opisyales sa Pardo nangayo og hinabang alang sa mga nasunogan

CEBU, Philippines — Padayon pa nga nanghipos og impormasyon ang kabomberohan sa hinungdan sa nahitabong sunog niadtong Domingo sa buntag diha sa Middle Tabucanal, Barangay Pardo, Dakbayan sa Sugbo.

Matud ni Chief Inspector Noel Nelson Ababon nga imbitahon nila ang tag-iya sa balay diin nagsugod ang sunog lakip usab ang mga saksi niini apan tungod kay nalandig pa man sa tambalanan si Mario Tabura posibleng paadtoan niya kini sa imbestigador.

Samtang ang mga opisyal sa Barangay Pardo nga gipangulohan ni Kapitan Litang Abarquez nanawagan og mga dinalian nga hinabang alang sa mga panginahanglanon sa mga biktima sama sa unlan, habol, banig, personal nga gamit sama sa mga underwear o bisan unsa nga hinabang alang sa 150 ka mga pamilya nga apektado sa sunog.

Samtang ang fire marshall sa Dakbayan sa Talisay Senior Inspector Arra Alfajaro nitug-an nikabat sa P350 mil ang danyos sa sunog diha sa Barangay Tangke niadtong Domingo sa hapon nga niabot sa task force bravo, tungod usab sa kapig-ot sa lugar.

Pipila sa mga biktima sa sunog sa Barangay Pardo gipahiluna diha sa gym sa Poblacion Pardo samtang ang uban nakakita na og kaabangan nilang balay. (BANAT NEWS)