P1.2 bilyon abot sa city hall sa business renewal

CEBU, Philippines — Nikabat ngadto sa P1.2 bilyon ang nakolekta sa kagamhanan sa Dakbayan sa Sugbo gikan sa renewal sa business permit sulod sa 20 ka adlaw ug taas kini og 20 porsyento itandi sa niaging tuig nga 21-day collection matud ni Cebu City Treasurer Arlene Rentuza.

Kahinumduman nga ang kagamhanan sa siyudad nihatag og pipila ka adlaw sa mga business owner aron maka-renew sa ilang business permit gikan niadtong Enero 4 ug natapos sa Enero 25 diha sa Robinson’s Galleria.

Matud ni Rentuza nga niabot ngadto sa 32,869 ang gidaghanon sa nagpa-assess kanila diin taas kini itandi sa niaging tuig nga anaa lang sa 32,828.

Sa 32,869 niabot ngadto sa 32,262 ang nibayad diin adunay 600 ang nagpa-assess lang apan wala nakabayad.

Awhag ni Rentuza sa mga business owner nga wala pa naka-renew nga mohimo usab sa ilahang obligasyon sa pagbayad sa ilang buhis subay sa pag-operate sa ilang business aron malikayan ang pagbayad og penalty ug interest.

Sa laing bahin, tinguha sa Kapitolyo nga makakuha kini og P3.966 bilyones nga kita sa tibuok tuig 2019.

Matud ni Atty. Roy Salubre, provincial treasurer nga menos kini itandi sa P4.039 bilyones nga target sa tuig 2018.

Nipasabot si Salubre nga menos ang karon nga tuig itandi sa niaging tuig gumikan kay niadtong 2018 ilahang gipaabot nga mahalin ang Cebu International Convention Center og P300 milyones ngadto sa Dakbayan sa Mandaue.

Gani nilapas ang Kapitolyo sa target niini sa tuig 2018 diin niabot ngadto sa P4.234 bilyones ang tibuok nga collection o 104. 85%.

Dugang ni Salubre nga karong tuiga ilang hingusgan ang tax collection ug ipadayon ang auction sale. Le Phyllis F. Antojado, BDB, (BANAT NEWS)