Quisumbing gireklamo og PWD

CEBU, Philippines — Midangop sa buhatan sa Ombudsman-Visayas ang usa ka Person with  Disability (PWD) nga usa sab ka kawani sa Mandaue City Hall  aron pasakaan og kaso  ni Mayor Luigi Quisumbing.

Ang PWD nga si Michael Pielago mialegar nga mayor nakahimo og kalapasan sa gihimo niini nga pagbalhin kaniya ngadto sa laing buhatan sa kagamhanan sa maong dakbayan.

Matud ni  Pielago nga si Quisumbing nakahimo og kalapasan ubos sa Republic Act 7277 kun Magna Carta for Disabled Persons, Oppression ug ingon man kalapasan sa Republic Act 3019  o Anti-graft and Corrupt Practices Act.

Ang 44-anyos nga kawani kasamtangang nadestino sa Housing and Urban Development Office (HUDO) subay sa memorandum nga giluwatan sa mayor niadtong Enero 7, 2019.

Matud pa niya nga gibalhin siya sa maong buhatan gikan sa kanhi niya trabaho sa  Hope of HOME, usa ka pasilidad sa kagamhanan alang sa kabataan nga adunay giatubang nga kaso. Sa iyang reklamo, gipasabot ni Pielago nga naglisod siya sa iyang kahimtang sa pagtuman sa iyang trabaho sanglit ang buhatan sa HUDO anaa nahimutang sa ikaduhang andana sa Mandaue City Hall annex building. Si Jun Vileganio, ang public information officer sa kagamhanan sa siyudad miingon nga ang mayor wala pa makaluwat og reaksiyon labot sa maong reklamo. Si Pielago  nga nagsugod sa pagtrabaho sa Mandaue City Social Welfare Office niadtong Septiyembre 1, 2014, panahon ni kanhi mayor Jonas Cortes. (/DILT)(BANATNEWS)