Polis makabayad sa kalapasan sa trapiko

CEBU, Philippines — Makabayad gyud og multa sa kalapasan sa trapiko ang polis sa Mandaue City Police Office (MCPO) nga gidakop sa traffic enforcer atol sa iyang pagmaneho sa ilang sakyanan niadtong Enero 14.

Si Police Senior Superintendent  Julian Entoma, direktor sa MCPO miingon nga gipugngan lang ang pangalan sa maong polis ug iya na kining gimanduan sa pagpangayo og pasaylo pinaagi sa sulat ug ipadala ngadto sa kagamhanan sa Dakbayan sa Mandaue.

Ang maong polis giingong nakahimo og kalapasan sa trapiko  pinaagi sa pagsulod sa lugar nga gibutangan og “No Entry” sign  board sa buhatan sa Traffic  Enforcement Agency of Mandaue (TEAM) nga gipahimutang sa bag-ong merkado publiko sa Brgy. Centro.

Si PSSupt. Entoma  sa iyang sulat, nangayo usab og pasaylo sa nahimong  sayop sa iyang sakop ug iyang gipanguro nga dili kini magpanagana sa pagpahamtang og silot gikan sa iyang buhatan subay sa kalapasan nga nahimo.

Gipadala ni Entoma ang maong sulat ngadto kang Atty. Elaine Bathan nga maoy  chief of  staff  ug executive secretary  ni Mayor Luigi  Quisumbing.

Ang maong sulat ni Entoma maoy tubag sa sulat gikan ni Atty. Bathan aron kini pahibaw-on sa nahimong kalapasan sa polis.

Gipasabot ni Bathan sa iyang sulat ngadto kang Entoma nga samtang mipatuman og traffic scheme ang taga TEAM sa naasoy nga lugar, ang polis nga nagmaneho sa ilang police car wala magpakabana sa sign board nga gibutang. Nahitabo kini niadtong Enero 14 pasado ala una sa hapon.

Nunot niini gihangyo ni Bathan si Entoma nga angay mapahinumduman ang mga sakop niini kun unsay mga lagda sa trapiko nga gipatuman sa kagamhanan sa maong dakbayan. (BANAT NEWS)