Team leader sa PROBE gipusil

CEBU, Philippines – Nalandig sa tambalanan ang usa sa mga team leaders sa Prevention, Restoration, Orderly, Beautification Enhancement (PROBE) sa Dakbayan sa Sugbu human kini gipusil sa may M.J. Cuenco Avenue samtang padulong kining mouli sa ilang balay sa may Barangay Tejero ning dakbayan  kagahapon sa hapon.

Ang biktima naila nga si Arnulfo “Anul” Cadungog, ug igsuon ni kanhi kapitan ug karon konsehal Jessie Lou Cadungog.

Matud pa ni Raquel Bohol-Arcre, hepe sa Probe nga nahinabi sa Banat News, padulong mouli sa ilang balay ang biktima sa dihang gipusil sa wala mailhing mamumuno. Sumala pa ni Arce, dako iyang pagtuo ang gipahigayon nilang clearing operation sa may Silangan 2, sa Barangay Tinago ang hinungdan sa pagpamusil ilabi na daghan kaayo silang nadawat nga hulga nga nadawat may kalabutan sa pag restore nila sa dalan ug si Cadungog usab ang nahimong team leader sa clearing adlaw nga Miyerkules.

Gibutyag ni Arce, bisan sa mga hulga ug sa nahitabo ni Cadungog dili kini makapahuyang kaniya ug sa iyang sakop nga mohimo ug mopatuman sa ilang trabaho.  Hangtod ning pagsulat padayon pa nga giatiman sa mga doktor si Cadungog.

Ang kapulisan sa Waterfront Police Station padayon pa nihimo sa ilang imbestigasyon. (/IBM)(BANAT NEWS)