Silhig Festival hingpit nang gilusad

CEBU, Philippines – Hingpit nga gilusad sa Barangay Paknaan, Dakbayan sa Mandaue ang ilang  tinuig nga Silhig  Festival nga gikatakda nga pagahimuon karong Pebrero 10 ,2019.

Si Barangay Kapitan Malaquias Soco kinsa maoy nangulo sa pasiugdahan nilang Silhig Festival nibutyag nga walo ka contingent maoy ilang natala nga moapil sa showdown ug street dancing.

Matud ni Soco nga mokabat sa P800,000 ang ilang gigahin nga pundo alang sa  galastohan sa gihan-ay nilang kalihokan karong tuiga.

Ang mga kalihokan sa Silhig Festival kabahin kini sa tinuig nga pangilin ni Senior Santo Niño  sa Barangay Paknaan.

Gitataw ni Kapitan Soco nga wala sila mopausbaw sa  ganting salapi sa mamahimo nga mananaog nga naglakip sa showdown category diin ang premyo niini P10,000 alang sa ikatulo,  P15,000 ang  ikaduha ug P25,000 ang unang ganti.

Gawas niini, adunay special award usab nga ihatag ngadto sa mga mapiling contingent nga naglangkub sa best in costume, best in musicality ug uban pa.

Si Soco nagkanayon nga ang Silhig Festival maoy ilang pamaagi sa pag-promote sa gipalambo nilang panginabuhian nga mga Paknaanon nga produktong silhig nga ginama sa lanot sa buli.

Ang maong kalihukan karon nagdala sa tema nga “Silhig  sa Daan nga  Panahon atong Ipadayon”. (/BDB)(BANAT NEWS)