CEBU, Philippines – Nitahan sa iyang kaugalingon ang usa sa mga suspek sa nahitabong pinusilay sa Barangay Sambag Uno, Dakbayan sa Sugbo nga niresulta sa kamatayon sa tulo ka tawo niadtong adlaw nga Lunes sayo sa buntag.
Ang nitahan sa kapolisan mao si Vincent Navales kinsa nagpatabang sa ig-agaw niini nga polis. Si Navales adunay samad pinusilan sa iyang paa nga giingong naigo atol sa pinusilay.
Si Chief Inspector Eduard Sanchez, hepe sa Abellana Police Station nga nahinabi sa Banat News mitug-an nga una na nilang napasakaan og kasong homicide si Michael Bacaltos. Si Bacaltos anak ug igsuon sa mga nakalas nga silang Edwin Bacaltos (papa) ug Shaun Edwin Bacaltos. Lakip sa nakalas ang gipasanginlang nanulong nga si Vanzant Navales, residente sa St. Jude Acres, Bulacao-Pardo ning dakbayan ug igsuon sa mitahan nga si Vincent Navales.
Sigun pa sa hepe sa Abellana Police Station nga si Chief Inspector Edward Sanchez nga sayo sa buntag gisulong ni Vanzant Navales uban sa iyang manghud nga si Vincent Navales ug laing tulo ka mga higala ang panimalay sa mga Bacaltos.
Dunay nahitabong komprontase ug niresulta sa maong pagpamusil.
Ang usa sa mga anak ni Edwin nga si Michael Vincent Bacaltos, 26, kinsa gidakop human sa hitabo gikasohan na og homicide samtang karong adlawa ilang ipasaka ang kasong murder batok sa nitahan nga si Vincent Navales.
Si Vincent giingong nidiretso sa usa ka pribadong tambalanan sa Dakbayan sa Naga ug didto kini nagpatabang sa ig-agaw nga polis alang sa iyang pagtahan.
Gitug-an ni Sanchez, alas siete sa gabii niabot sa ilang buhatan si Navales, apan gidala kini sa tambalanan tungod kay nag-ungot pa ang bala sa tiil niini.
Padayong gipangita ang KG9 nga armas nga ilang nakita sa video ug sa tulo ka mga kuyog nilang Navales. Usa sa gisubay sa imbestigasyon ang anggulo nga love triangle base sa pangangkon sa mga Bacaltos. (/IBM)(BANAT NEWS)