Quisumbing mopasaka og kaso sa opisyales

CEBU, Philippines – Mosunod pa ang daghang kaso nga ipasaka sa kagamhanan sa Dakbayan sa Mandaue  batok sa mga opisyal nga giingong naghimo og anomalosong transaksiyon. Kini ang gipadayag ni Mayor Luigi Quisumbing nunot usab sa hingpit na nga pagpasaka niini og kaso batok sa pribadong kompaniya nga maoy nipalit sa 3.5 ka ektaryang luna nga gipanag-iya sa siyudad sa kantidad nga P50 ang matag metro kuwadrado.

Matud ni Quisumbing nga iyang plano karon ang pagpasaka og dugang  lima pa ka kaso batok  sa mga opisyal nga giingong nitugot  sa irregular nga transaksiyon ubos sa termino ni kanhi mayor ug karon 6th District Congressman Jonas Cortes.

Si Quisumbing ug Cortes kanhi kauban sa niaging 2016 election ug sa umaabot 2019 midterm election silang duha maoy nagkaatbang alang sa pagka mayor sa Dakbayan sa Mandaue. 

Gibutyag ni Quisumbig nga sa niaging pipila ka mga bulan adunay nangabot nga mga dokumento kabahin sa katahapan nga mga transaksiyon. Sa nasayran nga niadtong  Martes niining semanaha  si Quisumbing hingpit na nga nipasaka og annulment of the deed of sale batok sa usa ka  pribadong kompaniya sa pagpalit sa nahisgutang  luna nga nahimutang diha sa Barangay Looc. (/BDB)(BANAT NEWS)