CEBU, Philippines — Gibalhog na karon sa detention cell sa Presinto 1 sa Mandaue City Police Office (MCPO) ang pito ka mga motorista nga nadakpan sa checkpoint sa may Zuellig Avenue sa Brgy. Centro diin nasakmitan sila og mokabat sa P150 mil nga kantidad sa gituohang shabu.
Ang hepe sa Presinto 1 sa MCPO nga si PCInsp. Aldrin Villacampa miingon nga ilang gisugdan pasado alas 10 sa miaging gabii ang ilang checkpoint nga maoy hinungdan sa unang pagkasikop sa duha ka motorista nga sila si Crisanto Dimol, 23-anyos ug Edwin Hermogenes, 30-anyos, mga taga Lungsod sa Aloguinsan. Nakuhaan sila og usa ka gamay nga pakete sa gituohang shabu ug drug parapahernalia.
Nakuhaan sab og pinakete sa gidudahang shabu ug mga kahimanan alang sa paggamit niini ang ilang nadakpan nga sila si Emmil Palarian, 38-anyos, taga Negros Occidental, Efren Curbo, 37-anyos, taga Dakbayan sa Lapu-Lapu.
Nadakpan usab sa checkpoint sila si Rey Quiñones, Joseph Discartin, ug Rolando Hera So Jr., nga taga Dakbayan sa Lapu-Lapu.
Nasakmitan sila og kahimaman sa paggamit og shabu ug walo ka gagmayng pakete ug usa ka medium pack sa gituohang shabu, mga shoulder bag ug mga paraphernalia.
Samtang pasado alas singko sa miaging hapon, ang kapolisan sa Danao City mipahigayon og buybust operation diin nadakpan sila si Jordan Paring, 32-anyos taga Brgy. Guinacot ug Glenn Mark Almacin, 30-anyos. Nakuhaan sila og onse ka gagmayng pakete sa gituohang shabu. Laing nadakpan sa dalan Mabini, Brgy. Poblacion pagka pasado alas siete sa gabii mao si Cesar Rosal Guevara, 30-anyos. Nasakmit gikan niini ang napulo ka gagmayng pakete sa gidudahang shabu ug P200 nga buybust money. (BANAT NEWS)