Mga polis, opisyales involved sa ambush?

CEBU, Philippines — Pagbanhig patay sa dinakpang drug personality atol sa pagdala unta kaniya sa korte gitan-aw nga binuhatan sa mga durugistang iyang gipangtug-an ang mga pangalan ngadto sa kapolisan.

Gimando ni PRO-7 Director Debold Sinas palawman ang imbestigasyon sa mga pangalan sa mga polis opisyal ug ubang lokal nga mga personalidad nga gipangbutyag Tocilio Debalucos Ababon.

Si Ababon dad-on na unta sa korte alang sa pagpasaka og kaso sa dihang gi-ambush ang patrolcar sa kapolisan sa Argao nga iyang gisakyan pag-abot diha sa Barangay Bulasa, sa Lungsod sa Argao niadtong Miyerkules sa buntag. Pagtin-aw sa direktor sa Cebu Provincial Police Office nga si Senior Supt. Manuel Javier Abrugena nga dili pa matawag nga mga persons of interest ang maong mga personalidad.

Apan siya miingon nga nagsugod na sila og case buildup ingun man background investigation sa mga gipanganlan ni Ababon. Si Ababon maoy gitumbok nga sinaligan sa druglord nga nitahan nga si Franz Sabalones.

"I have instructed yung ating mga chief of police to gather more information du’n po sa mga polis na pinangalanan and yung mga information na binigay before siya namatay ay pag-aaralan pa rin natin," matud sa maong direktor atol sa interbyu kagahapon. Nadakpan sa drug bust operation sa Provincial Intelligence Branch si Ababon niadtong Disyembre 29 didto sa Sitio Bilibid, Barangay Casay sa maong lungsod si Ababon.

Matud pa gipangtug-an niya ang mga pangalan sa mga polis ug uban pang  local officials nga nalambigit sa ilang illegal nga negosyo.

Sigurado ang direktor nga ni-leak ang impormasyon nga paingon ihatod sa korte sa Argao ang maong dinakpan.

"Di mangyayari ‘yun kung di alam ng suspects ‘yung whereabouts nung kanilang targets," miingon si Abrugena.

Kuyog ni Ababon niadtong hitaboa silang Police Officer 3 Ruel Patalinghug ug si PO3 Crescenciano Alajid. Naigo sa bukobuko si Patalinghug apan wala makadulot ang bala tungod sa gisuot niining bullet proof vest.  IBM (BANAT NEWS)