CEBU, Philippines – Kapolisan sa Dakbayan sa Sugbo wala makadawat og pinansyal nga suporta gikan sa lokal nga kagamhanan hangtud nga karon nagsugod na ang mga kalihukan alang sa Fiesta Señor ug Sinulog.
“For this special event, tingnan pa natin kung meron sa ngayon wala. Meals of additional gasoline, wala pa,” tug-an sa direktor sa Cebu City Police Office nga si PSSupt. Royina Garma. Giingong iguon na lang nila ang budget nga anaa nila karon. Samtang si PRO-7 regional director Debold Sinas nagkanayon nga bisan pa man og wala silay makuha nga suporta gikan sa lokal nga kagamhanan, magpadayon gihapon sila sa pagpatuman og hugot nga seguridad.
“Regardless whether naay tabang o wala ang City hall, we have to implement our security plan,” padayag sa heneral.
Gipasabot ni Sinas nga taas kaayo ang panahon sa planning stage alang sa Sinulog ug karon anaa na sila sa implementation stage diin gikinahanglan na ang suporta sa matag sektor sa gobyerno.
Gitahasan ni Sinas si Garma nga maoy mahimong ground commander sa maong selebrasyon.
Giangkon sa hepe sa CCPO nga namroblema sila karon sa pag-abaga sa budget alang sa pagkaon sa liboan ka mga personnel nga mobantay sa seguridad.
Maayo nalang nga sponsored sa Simbahang Katoliko ang pagkaon sa mga polis nga mobantay sa simbahan.
Karong adlawa ang opening salvo ug Walk with Jesus diin matud ni Garma, 400 ka personnel lakip na ang mga force multipliers ang mobantay sa seguridad.
Aduna sab 180 ka mga polis ang mobantay sa sulod ug gawas sa Basilica Minore del Santo Niño apan tungaon sila sa tulo ka mga shift. Kini kay alang ni Garma, mas epektibo ang mga polis kon dili sila hago kaayo sa pagbantay.
Sa laing bahin, gipadayag ni Sinas nga adunay 50 ka mga CCTV nga naka-install sa tibuok rota sa Sinulog.
Gawas niini, aduna usab kaugalingong mga CCTV ang gimontar ang kapolisan aron sa pagmonitor sa publiko. (/DILT)(BANAT NEWS)