CEBU, Philippines – Nagpabiling luwas ang Southern Cebu alang sa mga turista taliwala kini sa travel advisory nga gipagawas sa United Kingdom.
Atol sa coordination meeting nga gipatawag ni Gobernador Hilario Davide III kagahapon, ang kadagkuan sa Cebu Provincial Police Office gipangulohan ni PSSupt. Manuel Abrugena, mipresentar kini sa situation report sa habagatang bahin sa Lalawigan sa Sugbo.
Sa iyang report, adunay taho nga adunay armadong grupo apan walay kompirmasyon.
Apan ang kapolisan wala gihapon gisalikway nga adunay hulga hilabina nga nagkadaghan ang mga turista ug mipahimangno gihapon sila ngadto sa publiko nga dili mokompyansa ug magpabiling magbinantayon. Si Davide nagpasalamat sa kapolisan sa padayong gihimo nga monitoring ug bantay sa seguridad sa tibuok lalawigan ug miawhag nga tanan magpabilin nga alerto.
Samtang bawion sa Campo Crame ang mga police security sa mga opisyal aron malikayan ang attachment sa polis ngadto sa ilang gibantayang opisyal.
Ang direktor sa Police Regional Office-7, PCSupt. Debold Sinas nagkanayon nga sugdan kini ugmang adlawa, Biyernes.
Giingong ibalhin sila sa mga estasyonan ang mga police escorts.
Wala pay kasigurado kon ibalik pa sila og assign sa maong mga opisyal human sa piniliay. (Le Phyllis F. Antojado/DILT)(BANAT NEWS)