Gica: 17 ka kasal lehitimo

CEBU, Philippines — Gipasaligan ang mga magtiayon sa Lungsod sa Dumanjug nga gikasal ni Mayor Efren Guntrano Gica nga legal ang ilang kaminyuon sukwahi sa gipasiatab ni kanhi mayor Nelson Garcia.

Naabot sa 17 ka sibil nga kasal ang gihimo ni Gica gikan niadtong buwan sa Agosto hangtud Disyembre 2018. Iyang gipasalig nga kadtong kasal nga iyang gipahigayon tanan legal kay siya midaug man sa piniliay isip mayor ug wala hukasi sa iyang awtoridad subay na sa desisyon sa Court of Appeals (CA) nga mipabor kaniya.

“In good faith ato pag-assume and dili sad ko mo-relinquish. I’ll still be in my office with my vice mayor. I don’t think naay illegal ana. Kuyog mi sa ako vice mayor before, kuyog mi karon, kuyog mi ugma,” asoy pa ni Gica.

Kahinumduman nga niadtong tuig 2017, ang Ombudsman mi-dismiss kang Gica gumikan sa kaso diin giingong iyang gi-tamper ang resibo niadtong tuig 2014. Sa maong hitabo, si Vice Mayor Rene Asentista mao ang gitudlo nga acting mayor niadtong Enero 2018 pinaagi sa Department of Interior and Local Government (DILG).

Gikan sa Ombudsman, gisaka ang kaso paingon sa CA diin giingong gipadaplin una ang maong kaso.

Gumikan niini, nangangkon si Gica nga wala nay kaso batok kaniya.

“I’m happy nga na-reversed and set aside sa CA ang decision sa Ombudsman against nako. Si Nelson and Gwen wala pa nakakuha og decision from any court disqualified gihapon to run. And forfeit ang mga benefits pero nanagan. Pero they both know pildi sila. Pildi man gani si Gwen sa Dumanjug nga taga Dumanjug, mga Garcia giluwa na diri sa ilang lungsod sa Dumanjug. Samot dili matulon sa tibuok probinsiya sa Sugbo. I’ll pray for them, nga mausab unta ilang mga batasan ug itsura!,” pamahayag ni Gica.

Subay niini si Garcia nangangkon nga mi-file siya og motion for reconsideration (MR) pag-apelar sa desisyon sa CA. Sa kasamtangan, wala pa mopagawas og desisyon ang korte kabahin sa MR.

Ang kanhi mayor nangatarungan nga ang CA mibase sa iyang desisyon sa Aguinaldo doctrine, nga nagpasabot nga ang public official nga nakasala, mapasaylo kon makadaug gihapon sa eleksiyon.

Kabahin sa giingong pagpanikas sa resibo nga nahitabo niadtong 2014, diin si Gica na-reelected niadtong tuig 2016, matud ni Garcia dili applicable kang Gica ang Aguinaldo doctrine kay gi-abolish na kini niadtong tuig 2015 sa Supreme Court.

Kay anaa pamay nag-ong-ong nga MR, matud niini nga wala pa matapos ang kaso. Kon ugaling mopabor kang Gica ang CA, matud ni Garcia nga iya kining ipasaka ngadto sa Supreme Court.

Dugang niya nga ubos sa Section IV sa rules of court, ang kaso wala pa maresolba kay aduna pamay MR ug dili pa makasiguro si Gica nga abswelto na siya.

“He is not the legal mayor so he has no legal powers. Apil na ana ang pagkasal,” butyag ni Garcia.

Kini midugang nga abiso niya sa mga nakasal ni Gica nga mangita og legal nga tambag kabahin sa ilang kasal. (BANAT NEWS)