Mga polis nga ‘nagtinalawan’ taktakon

CEBU, Philippines – Direktor sa kapulisan sa rehiyon siyete nga si Police Chief Superintendent Debold Sinas mipasidaan sa iyang mga sakop nga dili magtinapulan human  lima ka pulis ang giimbestigahan karon tungod sa wala nila pagtuman sa mando ug pag-ikyas atol sa operasyon.

Sa iyang New Year’s Call sa mga station commanders ug provincial and city directors sa rehiyon si Sinas mipasidaan kanila nga kinahanglang pakamatyan ug barugan sa mga polis ang gipanumpaang tahas sa nasud ug sa katawhan.

“Dili magtinapulan and please be professional,” si Sinas miingon sa iyang tambag sa kapulisan.

Nasuko si Sinas tungod sa duha ka pulis sa Regional Public Safety Battalion sa PRO-7 nga mieskapo samtang nagsugod ang implementasyon sa search warrant kontra illegal nga armas sa Negros Oriental sa miaging buwan.

Ang duha mao ang manag-agaw nga sila si PO1 Thomas Caneta ug PO1 Melvin Caneta, pulos mga taga Dalaguete.  Pasakaan sila kasong administratiba alang sa cowardice ug dishonesty.

Matud ni Sinas  nga sa dihang nagbuto-buto na sa Guihulngan City nikalit lang og buwag sa ilang mga kauban ang duha ug namauli padung sa Poblacion.

Nagtuo sila nga gidagit sa mga NPA o ba kaha napatay ang duha kay wa nabalik mao nga ilang gipangita hangtud gabii.

“Ang tanang tawo nangita nila hangtod gabii, grabe nako ka high blood, ngano nagka-casualty mi? Only to find out during the technical support  nga nag beeping ila cellphone when everybody was looking for them, sila nagkuyakoy sa restaurant,” si Sinas miingon.

Ang duha giingong nangangkon nga nangatagak sila sa dagat, sapa ug na-trap. “Daghan sila reason, kumo nahulog sila sa dagat, sa suba, na-trap sila, tanan na nga reason,” matud ni Sinas.

Sigon pa ni Sinas, ang kaso sa duha dako og purohan nga ang silot pagkataktak sa serbisyo. Ang duha gidisarmahan na sa ilang mga labaw.

Samtang giimbestigar usab ang laing tulo ka mga polis nga pulos mga opisyal nga adunay ranggo nga Chief Inspector ug duha ka Inspectors  kansang mga pangalan wala ibutyag ni Sinas.

Ang tulo giingong naguna-una usab og pamauli bisan wa pa nahuman ang ilang operasyon.Sigon ni Sinas nasagmuyo siya apan wala na siya’y mabuhat sa mga tawo nga molikoy. (/IBM)(BANAT NEWS)