CEBU, Philippines — Ang Associated Labor Unions-Trade Congress of the Philippines, ang labing dakung unyon sa nasud, nagkanayon nga daku ang posibilidad nga ilaha nang ipadayon ang ilang tinguha sa pagduso sa petisyon alang sa pagpa-usbaw sa suhulan alang sa mga mamumuo sa Central Visayas.
Si Allan Tanjusay, ang tigpamaba sa ALU-TUCP, miingon nga buhaton nila kini gumikan ang ikaduhang hugna sa implementasyon sa TRAIN Law diin mosaka na usab ang excise tax sa lana sugod karong buwana.
Miingon si Tanjusay nga ilaha pa usab paabuton ang inflation rate sa Disyembre 2018.
Sa nahinumduman, wala lang sa gipadayon sa ALU-TUCP ang ilang tinguha sa pagduso sa maong petisyon pag Nobyembre 2018 tungod sa pag-ubos sa inflation rate. Buot unta sa ALU-TUCP nga ipasaka ngadto sa RTWPB-7 ang ilang petisyon nga P315 ngadto sa P317 nga umento sa sweldo matag adlaw alang sa mga mamumuo sa Central Visayas.
Samtang ang petisyon sa lima ka labor groups nga nagduso og P150 matag adlaw nga umento sa suhulan sa mga mamumuo sa Central Visayas, wala pa kini gituki sa RTWPB-7.
Ang lima mao ang Cebu Labor Coalition, Lonbisco Employees Organization, Nagkaisang Lakas ng Manggagawa-Katipunan, Metaphil Workers Union ug Unionbank Employees Association. (/LPM)(BANATNEWS)